ചില്ലിട്ട ചിത്രങ്ങൾ

ചില്ലിട്ടടച്ചത്
ഊഷ്മളമായൊരു കാലത്തെയാണ്
വാർദ്ധക്യത്തിനും വേർപാടിനും
ചില്ലടയ്ക്കുമ്പോലെ
ചില്ലുപുതപ്പിച്ചത്
ഉത്സവങ്ങളുടെ ചരിത്രത്തെയാണ്..

ചിത്രങ്ങളുടെ ചില്ലുവാതിലുകൾ,
വിട്ടിറങ്ങിയ വീട്ടിലേയ്ക്ക് തുറന്നിരിക്കുന്നു..
ഇവിടെന്റെ ഓർമ്മയുടെ ചില്ലുചിലങ്കകളിൽ
ചുവപ്പു പടരുന്നു..
ചിത്രങ്ങളൊക്കെയും ചില്ലക്ഷരങ്ങൾ പോലെ
അമൂർത്തം, അപൂർണ്ണം,
പൂമരചില്ലകളിലൊക്കെയും
പിന്നെയുമൊടുവിലൊരു ചില്ലണിഞ്ഞൊരന്ത്യാക്ഷരം.